یہ سسٹم ہمارے جذباتی رویّے اور سیکھنے کی صلاحیت کو بھی کنٹرول کرتا ہے۔ اپنے پسندیدہ پکوان کا محض تصور یا ذکر ہی اشتہا کو جگانے کے لئے کافی ہے۔

چند دوسرے عوامل
حقیقی بھوک کے مقابلے میں رسم و رواج اور عادات و اطوار کے زیر اثر کھانے کی مقدار کم یا زیادہ ہوتی ہے۔ یہی عوامل یہ بھی طے کرتے ہیں کہ آدمی 24 گھنٹوں میں کتنی مرتبہ کھائے۔ ہارمونس بھی بھوک کے میکنیزم پر اثر انداز ہوتے ہیں۔ گذشتہ چند برسوں میں پیپٹائڈس (Peptides) کا رشتہ بھوک سے جوڑنے کی کوشش کی جارہی ہے۔ جدید مطالعوں میں یہ بات سامنے آئی کہ دماغ میں تیار ہونے والا ہارمون نیوروپیپٹائڈس۔وائی (Neuropeptide-Y) بھوک کے نظام کو کنٹرول کرتا ہے۔ اس ہارمون کو سمجھنے کے لئے گہرا مطالعہ کیا جارہا ہے۔ مستقبل میں نیوروپیپٹائڈس۔وائیہاضمہ اور بھوک کے مسائل، امراض اور خامیوں و کمیوں کو سمجھنے اور ان کا علاج کرنے میں مدد کرے گا۔

کھانے کے لئے جینا یا جینے کے لئے کھانا
آپ کسی بھی شخص (بلا لحاظِ جنس و عمر) سے یہ سوال کیجئے کہ وہ کھانے کے لئے جیتا ہے یا جینے کے لئے کھاتاہے، تو اس کا جواب یہ ہوگا ’’میں تو صاحب صرف جینے کے لئے تھوڑا بہت کھالیتا ہو۔‘‘ لیکن اس کے ہونٹوں پر ہلکی سی شریر مسکراہٹ اور چہرے پر خفت و خجالت کے آثار آپ آسانی سے پڑھ لیں گے!

بھوک سے متعلق ہمارے رویّے
بھوک سے متعلق ہماری نفسیات کو یہ کہاوت بڑی وضاحت سے اجاگر کرتی ہے:
’’بھوکے شریف سے اور پیٹ بھرے رذیل سے ڈرنا چاہئے۔‘‘
ان دو انتہاؤں کے بین بین بھوک پر کئی گئی تحقیق سے اور کئی باتیں معلوم ہوتی ہیں۔ مثلاً ایک عام آدمی جو درمیانی ڈیل ڈول اور وزن کا ہو، کھانے میں کوئی خاص دلچسپی نہیں رکھتا، وہ اتنا ہی کھاتا ہے جتنااس کی جسمانی ضرورت کے لئے کافی ہو۔ اس کے بر خلاف موٹے اور اوور ویٹ (Over Weight) اشخاص ہر وقت کھانے پر آمادہ رہتے ہیں۔ کھانے کی خوشبو ان کی بھوک کو بڑھادیتی ہے اور اگر کھانا ذائقہ دار بھی ہو تو ان کا رک پانا ناممکن ہوجاتا ہے۔ لیکن ایک عام آدمی اسی وقت کھاتا ہے جب اسے بھوک لگتی ہے۔
کئی بار تو لوگ دوسری وجوہات کی بناپر بھی کھاتے ہیں۔ ان کے کھانے کا تعلق نہ تو بھوک سے ہوتا ہے اور نہ مقررہ وقت سے مثلاً کچھ اپنا اکیلا پن دور کرنے یا بوریت کو مٹانے کے لئے بے ضرورت کھاتے ہیں۔کچھ لوگ راتوں کو اٹھ کر بھی کھاتے ہیں۔ بعض لوگ دورانِ سفر لگاتار کھاتے رہتے ہیں، کسی پھیری والے کو خالی نہیں جانے دیتے۔ کھانا کھانے میں نظام الاوقات (ٹائم ٹیبل) کی پابندی نہ کرنا، بے ضرورت کھانا، ضرورت سے زیادہ کھانا وغیرہ ایسی عادتیں ہیں جن کا تعلق انسانی نفسیات سے ہے۔ جذباتی تحفظ کی کمی کو اس رویے کا ذمہ دار ٹھہرایا گیا ہے۔ دنیا میں آنے کے بعد انسان سب سے پہلے بھوک کا تجربہ کرتا ہے۔ اس کا اولین احساس بھوک کا احساس ہے۔ اس کے اظہار کے لئے بچہ روتا ہے۔ ضرورت پوری ہوجانے پر وہ مطمئن ہوجاتا ہے۔ یہی رویہ زندگی بھر اس کا ساتھ دیتا ہے۔

کتنا بے بس ہے آدمی!
بھوک کے احساس پر قابو پانا بہت مشکل ہے۔ بھوک لگنے کے بعد آدمی جلد سے جلد کھانا کھا لینا چاہتا ہے۔ البتہ رمضان المبارک کے روزوں کے دوران آدمی کی نفسیات یکسر تبدیل ہوجاتی ہے۔ سماج پر سایہ فگن روحانی ماحول آدمی پر اثر انداز ہوتا ہے۔ اللہ کے حکم کی بجا آوری کا پختہ عزم اس کی قوتِ ارادی کو کئی گنا بڑھا دیتا ہے اور وہ آسانی سے بھوک اور پیاس پر قابو پالیتا ہے۔ لیکن عام دنوں میں یہ ممکن نہیں ہے۔ بھوک کی شدت آدمی کو توڑکر رکھ دیتی ہے۔ بھوک کی شدت میں اگر سامنے کھانا آجائے تو اعصاب کی مضبوطی اور قوتِ ارادی کی قلعی کھل جاتی ہے۔ یہ ساری چیزیں ڈھکوسلہ ثابت ہوتی ہیں!
بھوک پیاس اور دوسری جبلتوں پر قابو پانے کے لئے ہم بھی مولانا حالیؔ کی طرح اللہ تعالیٰ سے یہ دعا مانگ سکتے ہیں:
دنیا میں ایک شے مرے پرور دگار دے
یعنی کہ میرے دل پہ مجھے اختیار دے

لیکن عام مشاہدے کی بات تو یہ ہے کہ چاہے ہمارا پیٹ بھرا ہوا ہی کیوں نہ ہو، خوشبودار ، خوش رنگ اور خوش ذائقہ پکوان سامنے آجائیں اور ان کے ساتھ گرم گرم سموسے اور شامی کباب بھی ہوں تو۔۔۔۔
نہ جانے دیکھ کے کیوں ان کو یہ ہوا احساس
کہ میرے دل پہ انہیں اختیار آج بھی ہے